සිතට නිවනක් , කඳුලට සිනහවක්....

පසුගිය 27 සහ 28 දිනයන්හි ගාල්ල ප්‍රදේශය අවට විශේෂ ප්‍රජා සත්කාරක වැඩපිළිවෙලක්, සිරි සමන්තභද්‍ර අරහත් මහා ස්වාමින්වහන්සේගේ මග පෙන්වීම යටතේ,සිරි සදහම් ආශ්‍රමවාසී ශිෂ්‍ය ස්වාමින්වහන්සේලා සහ තරුණ සංවිධානය මගින් සංවිධානය කරන ලදී. ඒ අනුව නොවැම්බර් මස 27 දින ගාලු ප්‍රදේශය අවට පාසල් හතරක ඉගෙනුම ලබන පාසල් දරුදැරියන් සහ ගාල්ල ධර්මදූත පිරිවෙන ජාත්‍යන්තර බෞද්ධ මධ්‍යස්ථානය සඳහා පොත්පත් හා පිරිකර බෙදා දීම සිදු කළහ. එදින රාත්‍රියේ ගාල්ල සම්බෝධි ළමා නිවාසයේ වෙසෙන අබාධිත ළමුන් සඳහා රාත්‍රී ආහාරය ආශ්‍රමයේ තරුණ සංවිධානය මගින් සූදානම් කෙරිණ. 
නොවැම්බර් මස 28 දින ගාල්ල විජයානන්ද පිරිවෙනෙහි ආර්ය මහා සංඝ රත්නය 60 නමක් විෂයෙහි උදෑසන දානයද, ගාල්ල සම්බෝධි ළමා නිවාසයේ අබාධිත ළමුන් සඳහා උදෑසන ආහාරය, වියළි ද්‍රව්‍ය සහ සෙල්ලම් භාණ්ඩ බෙදා දෙනු ලැබිණ. තවද,ආශ්‍රමවාසි සංඝයා වහන්සේලා ගාලු නගරය අවට ගෙපිළිවෙලින් පිඬුසිඟා වැඩම කළ අතර ඊට සමගාමිව සද්ධර්මය අඩංගු පොත්පත් හා සීඩී තැටි 1000ක ප්‍රමාණයක් නොමිලයේ බෙදා දෙනු ලැබුහ. අනතුරුව E.A.P සමූහ ව්‍යාපාරයේ හිටපු අධිපතිනි ගරු ආචාර්ය සෝමා එදිරිසිංහ මැතිනියගේ සසර ගමන සුවපත් වීම පිණිස ගාල්ල විජයානන්ද පිරිවෙනෙහි ආර්ය මහා සංඝ රත්නය 60 නමක් විෂයෙහි දානයක් පිරිනමන ලදී. එහිදී උන්වහන්සේලා සඳහා පිරිකරද පිරිවෙන් භික්ෂුන්වහන්සේලා 20 නමක් සඳහා පොත්පත් හා පිරිකර ද්‍රව්‍යද පූජා කෙරුණි. මේ උතුම් පිංකමට එදිරිසිංහ පවුලේ සාමාජිකයන්ද දායක වූහ. එසේම ආර්ථික දුෂ්කරතා ඇති අයෙකුට ඔහුගේ අබලන් වූ පාපැදිය වෙනුවෙට ආශ්‍රමවාසි සංඝයා වහන්සේලා මගින් නව පාපැදියක් පරිත්‍යාග කෙරුණි. ආශ්‍රමවාසී මහා සංඝයා පිඬු සිඟා වැඩීමෙන් ලැබෙන ආධාර මුදලින් ඉහත පොත් පත් සහ පා පැදිය පරිත්‍යාග කිරීම විශේෂත්වයකි.