උඩුගම් බලා යාම හෙවත් සිංහනාදය....

ලොවට පරම සත්‍ය පහළ වන්නේ කාලාන්තරයකට සැරයක්ය.ඒ තාක් මිනිසුන් විවිධ මැති මතාන්තර ඔස්සේ සම්ප්‍රදායික සමාජයක් තුළ සත්‍ය අසත්‍ය පිලිබඳ, ධර්මය අධර්මය පිලිබඳ නිගමනයක් කිරීමට නොහැකිව අවිද්‍යාවෙන් අන්ධ වී ගමන් කරයි. අවිද්‍යාවෙන් පිරි ලොවට සත්‍ය ගෙනහැර දැක්වීම පහසු කටයුත්තක් නොවේ. මක් නිසාද ධර්මයේ නාමයෙන් අධර්මය පතුරවන ඇතැම් පැවිද්දන්, පූජකයන් හා පාලකයින් තම බඩගෝස්තරය රැක ගැනීම වෙනුවෙන් මිනිසුන් මුලාවට පත් කරමින් රැගෙන ආ පූජක හා පාලක වෘත්තීන් නිර්ධය ලෙස විවේචනය කර, ප්‍රබුද්ධ සමාජයක් උදෙසා පරම සත්‍ය ලොවට දේශනා කරන ගලවුම්කරුවානන් වහන්සේට විරුද්ධව සේනා බලමුළු සංවිධානය කරන නිසාය. උන්වහන්සේ අප ජිවත් වූ සමාජය තුළ ජිවත් වූවෝය. තරුණයකු ලෙස වසර 24 ක කාලයක් ජිවිතයේ සියලු සැප සම්පත් , ගිහි ජීවිතය තුළ විඳ අවසන් කළෝය. එසේම ඉවසීමෙන් සියලු දුක් වැඩ වේදනා දරාගෙන පැවිදි සමාජය තුලද වසර දහයකට වඩා වැඩි කාලයක් ගත කළෝය. නමුත් එයද ගිහි සමාජයේ මිනිසුන් කටයුතු කරනවා සේම, විවිධ භෞතික දෑ චාරිත්‍ර-වාරිත්‍ර හා පුද පුජා කරමින් පවත්වාගෙන යන තවත් එක් ජිවන ක්‍රමයක් ම බව ප්‍රත්‍යක්ෂ කළෝය. පොත් කටපාඩම් කරමින් පුදපුජා පවත්වමින්, සමාජයේ ආධිපත්‍ය දිනාගත් බ්‍රාහ්මණයන් හා ජෛනයන් එදා ගෞතම බුදුන් වහන්සේට විවිධ චෝදනා එල්ල කළා සේම නිදහසේ සිතමින් සමාජයට සත්‍ය පෙන්වා දුන් උන්වහන්සේටද, ගිහි සමාජයෙන් මෙන්ම පැවිදි සමාජයෙන් ද තදබල ලෙස බොරු චෝදනා අපහාස නින්දා එල්ල විය. එහෙත් අවසානයේ ජද්දන්ත කුලයේ මහා හස්ති රාජයෙකු මෙන් සියලු අභියෝග වලට මුහුණ දුන් උතුමාණෝ මල් යහනාවක් මත නොව අකුණු ගසමින් ගිගුම් දෙන මොරසුරන වැසි ඇති රාත්‍රියක ලොව පවතින්නා වූ පරම සත්‍ය ප්‍රත්‍යක්ෂ කොට ලොව්තුරු සුවයට පත්විය. මේතාක් මාධ්‍ය මගින් පල නොකොට සඟවන ලද ලිපි කිහිපයක්ද ඒ භාග්‍යවත් වූ අරහත් වූ සිරි සමන්තභද්‍ර මහා ස්වාමින්වහන්සේගේ ජන්මදින පිංකම වෙනුවෙන් සින්දු කරන ලද මහා දානය හෑල්ලුවට ලක් කරමින් මහා නායක,අනෙකුත් හිමිවරුන් හා පුවත් පත් මඟින් කරන ලද නින්දිත ද්වේශ සහගත ප්‍රකාශයන්ට පිළිතුරු වශයෙන් ඉදිරිපත් කළ නමුත් ඒ ඉදිරියේ නිර්ලජ්ජිතව පලාගිය ඒ හිමිවරුන් මේ වන විටත් කිසිඳු පිළිතුරක් ලබා දී නොමැති ලිපි ඇසුරින් මෙම ග්‍රන්ථය එළිදක්වන ලදී...